Azərbaycan çempionatı: Mövsümdə ilk dəfə bərabərlik qeydə alındı

18.12.2023

2061

Paylaş:

Həndbol üzrə ölkə çempionatında 5-ci turun oyunları olub.
Qadınların mübarizəsində “İdman Akademiyası” “Gənclər Birliyi”nə 28:20 hesabı ilə qalib gəlib.
Lider “Qarabağ” növbəti uğuru “Bakı” üzərində qazanıb. Qarşılaşmanın aşkar favoriti olan “Qarabağ” həndbolçularının üstünlüyü hesabda da əksini tapıb - 41:12.
Turun maraqlı oyunu “Azəryol” və “Kür” arasında olub. İlk hissəni meydan sahibləri 14:13 hesabı ilə xeyirlərinə tamamlayıblar. Fasilədən sonra görüş daha gərgin idman mübarizəsində keçib. “Azəryol” son dəqiqələrdə 30:28 hesabı ilə öndə olarkən, komandanın üzvü Marta Slemanova meydandan kənarlaşdırılıb. Say üstünlüyü qazanan qonaqlar bu fürsətdən yararlanıb. Ardıcıl iki qol vuran “Kür” məğlubiyyətdən xilas olub - 30:30.
Maksimum nəticə göstərən “Qarabağ” 10 xalla liderdir. Hesabında 7 xalı olan “Azəryol” və “Kür” 2-ci - 3-cü yerləri bölüşür. “İdman Akademiyası” 4 xalla 4-cü, “Bakı” 2 xalla 5-cidir. Xal qazana bilməyən “Gənclər Birliyi” isə sonuncu yerdədir.
Kişilərin turnirində də 5-ci tur maraqlı oyunlarla yadda qalıb.
“Təhsil” - “Qarabağ” matçında gənc həndbolçular çox çalışsalar da, güclü rəqibin hücumlarının qarşını ala bilməyiblər – 22:36.
Gərgin mübarizə şəraitində keçən “Bakı” – “Azəryol” görüşünün fasiləsinə 1 topluq üstünlüklə yollanan meydan sahibləri üstünlüyü sonadək qoruya bilməyib. Yüksək əzmkarlıq göstərən “Azəryol” geridönüş etməyi bacarıb. Xüsusilə matçın sonlarında daha inamlı təsir bağışlayan “Azəryol” həndbolçuları 31:29 hesablı qələbə qazanıblar.
Turun son matçında “İdman Akademiyası”nı qəbul edən “Kür” isə rəqibinə çətinlik çəkmədən qalib gəlib - 42:17. Bu qələbə ilə xallarının sayını 10-a çatdıran “Kür” ilk pillədəki yerini möhkəmlədib. “Bakı” və “Qarabağ” 6 xalla müvafiq olaraq 2-ci - 3-cü yerdə qərarlaşıb. 4 xallı “Azəryol” 4-cü, ondan 2 xal az toplayan “İdman Akademiyası” 5-ci yerdədir. “Təhsil” və “Dinamo” isə autsayderdir.