Yeniyetmə həndbolçular arasında Azərbaycan və Bakı birinciliyinə yekun vurulub

05.06.2022

2499

Paylaş:

Şağan Olimpiya İdman Kompleksində 2006-2008-ci il təvəllüdlü oğlanlar arasında həndbol üzrə Azərbaycan birinciliyi və 2006-cı il təvəllüdlü və ondan kiçik yaşlı yeniyetmə qızlar arasında 28 may - Müstəqillik Gününə həsr olunmuş Bakı şəhər birinciliyinə yekun vurulub.

Yarışın son günündə keçirilən oyunlarda oğlanlardan ibarət “Bakı 1” (Təhsil yığması) “Bakı 2” (6 saylı İOEUGİM) komandasını 26:8, “Gəncə” “Bakı 3” komandasını 26:18 hesabı ilə məğlub edib. Digər görüşlərdə “Bakı 2” (6 saylı İOEUGİM) “Bakı 3”ə 19:9, “Bakı 1” (Təhsil yığması) “Mingəçevir”ə 24:16 hesabı ilə qalib gəlib.

Qızların yarışında isə "2 saylı İOEUGİM" "6 saylı İOEUGİM-2" komandası üzərində qələbə çalıb – 14:9.

Nəticələrə əsasən, “Bakı 1” (Təhsil yığması) komandası 2006-2008-ci il təvəllüdlü oğlanlar arasında həndbol üzrə Azərbaycan birinciliyinin qalibi adını qazanıb. İlk üçlüyü “Bakı 2” (6 saylı İOEUGİM) və “Gəncə” komandaları qapayıblar.

2006-cı il təvəllüdlü və ondan kiçik yaşlı yeniyetmə qızlar arasında 28 may - Müstəqillik Gününə həsr olunmuş Bakı şəhər birinciliyi isə, "2 saylı İOEUGİM" kollektivinin qələbəsi ilə yekunlaşıb. 2-ci-3-cü yerləri müvafiq olaraq "6 saylı İOEUGİM-1" və "6 saylı İOEUGİM-2" komandaları tutublar.

Bağlanış mərasimində qalibləri təbrik edən Azərbaycan Həndbol Federasiyasının İdman Şöbəsinin müdiri İsgəndər Əsgərov onlara qarşıdakı yarışlarda da uğurlar arzulayıb. Federasiyanın baş katibi Yusif Atakişiyev, həmçinin Bakı Şəhər Gənclər və İdman Baş İdarəsinin rəis müavini Rəşad Əliyevin də qatıldığı mükafatlandırma mərasimində idmançılara diplom, medal və hədiyyələr təqdim olunub.