“Qarabağ” vahid liderliyə yüksəldi

24.01.2026

312

Paylaş:

Kişi həndbolçuların Azərbaycan çempionatının 4-cü turunda diqqətlər “Bakı”–“Qarabağ” oyununa yönəlmişdi. Liderlər qrupunda qərarlaşan komandaların görüşü gərgin və maraqlı mübarizə vəd edirdi. Çempionluğa iddialı rəqiblər bu matçda qazanılacaq qələbə sayəsində vahid liderliyə yüksəlmək niyyətində idilər. “AHF Arena”da keçirilən oyunu respublika dərəcəli referilər Ləman və Aydan Həmidova idarə ediblər. Hakim-inspektor isə Ernest Ağakişi olub.

Ötən tur “Kür”ü məğlubiyyətə uğradan Azərbaycan çempionu bu qarşılaşmanın da favoriti sayılırdı. Amma görüşə “Qarabağ” komandası daha inamlı başlayıb. Qədir Azadlının dəqiq zərbələri ilə irəli çıxan nominal qonaqlar iddialarını erkən büruzə veriblər. Bununla razılaşmayan “Bakı” tədricən toparlanmağı bacarıb. İmkanlardan layiqincə faydalanan Eldar Fərəcovun komandası 17-ci dəqiqədə geriliyi aradan qaldırmaqla vəziyyətə nəzarəti ələ alıb. Hissənin sonlarına yaxın “Qarabağ” hesabı bərabərləşdirməyə yaxın olsa da, Real Əliyev penalti fürsətini qaçırıb. Əvəzində rəqib qapısına daha iki dəfə yol tapan “Bakı” fasiləyə üstün yollanıb –11:8.

Görüşün ikinci hissəsi daha gərgin mübarizə ilə yadda qalıb. Bəzi epizodlarda bu gərginlik kobudluqla müşayiət olunub və hakim sərt qərar qəbul etmək məcburiyyətində qalıb. 43-cü dəqiqədə “Bakı” komandası aparıcı oyunçusu Elnur Hüseynzadəni bu səbəbdən itirməli olub ki, onun yoxluğu matçın gedişinə təsirsiz ötüşməyib. Tədricən təşəbbüsə yiyələnən qonaqlar 51-ci dəqiqədə irəli çıxaraq üstünlüyü sonadək qorumağı bacarıblar -25:23 və xal sayını 10-a çatdıran “Qarabağ” çempionatın vahid lider ünvanına sahib çıxıb. “Bakı” 8 xalla ikincidir. İlk üçlüyü 6 xalla “Kür” komandası qapayır.

Son Xəbərlər

28.05.2026

28 May - Müstəqillik Gününüz mübarək!

27.05.2026

Müqəddəs Qurban bayramınız mübarək!...

15.05.2026

Qadın həndbolçuların ölkə çempionatında XV turdan ...

13.05.2026