“Kür” çempionluğa doğru inamla irəliləyir

06.05.2024

Paylaş:

Kişi həndbolçuların Azərbaycan çempionatında 19-cu tura Bakıda start verilib. “AHF Arena”da keçirilən mərkəzi oyunda “Azəryol”la “Kür” üz-üzə gəlib. Maraqlı mübarizə vəd edən görüşü beynəlxalq dərəcəli referilər Ələkbər Ağakişiyevlə Ernest Ağakişi idarə edib. Oyunun deleqatı isə beynəlxalq dərəcəli hakim Vaqif Əliyev olub. Yarışın lideri “Kür” üçün bugünkü oyun çempionluq yolunda vacib əhəmiyyət daşıyırdı. “Azəryol” da mükafatlara iddiasını qorumaq üçün qələbəyə köklənmişdi. Gözlənildiyi kimi gərgin mübarizə ilə yadda qalan matçın startında bərabər oyun qeydə alınsa da, tədricən təşəbbüsə yiyələnən qonaqlar qapıçı Aleksandr Milenkoviçin də inamlı oyunu sayəsində irəli çıxıblar. Amma dərhal toparlanan Vidadi Əliyevin komandası kəsərli həmlələr sayəsində geriliyi aradan qaldırıb. Bununla kifayətlənməyən ev sahibləri təzyiqi bir qədər də artıraraq fasiləyə üstün yollanıb - 15:14.

Amma ev sahibi təşəbbüsü qorumağı bacarmayıb. İkinci hissəyə daha fəal başlayan “Kür” tezliklə geriliyi aradan qaldırıb. İntriqanın qızışması rəqiblər arasında gərginliklə müşayiət olunub. 36-cı dəqiqədə Kiril Razumovla Rəsul Şərifi arasında yaşanan mübahisə hər iki həndbolçunun iki dəqiqəlik meydançadan kənarlaşdırılması ilə nəticələnib. Qalan vaxtda üstünlük Mingəçevir həndbolçularının tərəfində olub. Bunun məntiqi nəticəsi kimi hesab arasındakı fərq də qonaqların xeyrinə artmağa başlayıb. Hücumları daha effektli yekunlaşdıran “Kür” müdafiədə də daha diqqətli oyun sayəsində azarkeşlərini növbəti qələbə ilə sevindirib - 31:22.

Bu qələbə ilə xal ehtiyatını 28-ə çatdıran “Kür” çempionluq yolunda daha bir inamlı addım atıb.

Son Xəbərlər

18.05.2024

ALMATA(Qazaxıstan) - Azərbaycan 20:28 (8:13)...

17.05.2024

ROPSTTM (Özbəkistan) - Azərbaycan 31:39 (18:20)...

16.05.2024

Azərbaycan – OKMK (Özbəkistan) 30:28 (18:13)...

15.05.2024