Yeniyetmə həndbolçular yarışlarda iştirak ediblər

03.06.2022

2748

Paylaş:

Şağan Olimpiya İdman Kompleksində 2006-2008-ci il təvəllüdlü oğlanlar arasında həndbol üzrə Azərbaycan birinciliyi və 2006-cı il təvəllüdlü və ondan kiçik yaşlı yeniyetmə qızlar arasında 28 may - Müstəqillik Gününə həsr olunmuş Bakı şəhər birinciliyinə start verilib.

Yarışın açılış mərasimində iştirak edən Azərbaycan Həndbol Federasiyasının əməkdaşları İsgəndər Əsgərov və Lyudmila Şubina komandaların sayının artmasının həndbolun inkişafından xəbər verdiyini vurğulayıb. Yaxın zamanda həndbol üzrə növbəti Azərbaycan çempionatının keçiriləcəyini də diqqətə çatdıran federasiya nümayəndələri iştirakçılara uğurlar arzulayıblar.

Yarışın ilk günündə qılzardan ibarət komandalar bir, oğlanlar isə iki dəfə meydana çıxmaqla, ümumilikdə üç oyun keçirilib. Açılış matçında "6 saylı İOEUGİM-1" komandası "6 saylı İOEUGİM-2" kollektivinə 10:7 hesabı ilə qalib gəlib.

Oğlanlar arasındakı ilk qarşılaşmada “Bakı 2” (6 saylı İOEUGİM) komandası "Gəncə" komandasını 20:19 hesabı ilə üstələyib. Günün son görüşündə "Mingəçevir" və "Bakı 3" komandaları üz-üzə gəliblər. Maraqlı mübarizə şəraitində keçən oyun "Mingəçevir" həndbolçularının 21:14 hesablı qələbəsi ilə yekunlaşıb.

Yarışlar iyunun 5-dək davam edəcək.